ابي نظره..ابي كلمه..

**ابي نظره..ابي كلمه..ابي همسه من شفاتك**
ابي وصلك..ابي قربك ابيك تحس ياقاسي

ابيك تحس لو مره أنا مليت قسواتك
تحملت العذاب ولا انحنى لك بالهوى راسي

أبي يشرق سنا شمسك قليله حيل طلاتك
أبيك تصير لي دايم مثل ظلي يا أعز ناسي

أبي أسمع سواليفك حقيقه أشتقت لضحكاتك
عسى لازلت تذكرني أخافك ساهين ناسي

عسى درب المواصل ما تعثر فيه خطواتك
تجيني كلك من أقصاك تداوي الجرح وتواسي

عسى مركب غرامي يوم يبحر في محيطاتك
تصير الساحل المأمون أبدد فيك.. هوجاسي

على كثر الخطا منك...عفيت لكل .. زلاتك
تحملتك بما فيه الكفايه ولا انكسر باسي

أنا عندي أمل في يوم تجيني كلك بذاتك
أحس إنك تناديني على الله يصدق إحساسي

تكلم قول خبرني....علامه طول سكاتك
أنا ما كنت متوقع تكون بهالشكل قاسي ..!!**